सुखड : संस्कार सहितको गुणस्तरीय शिक्षा प्रदान गर्दै आइरहेको न्युस्टार इङ्ग्लिस बोर्डिङ्ग स्कुल, घोडाघोडी–१, को विशेष पहलमा आज श्रावण महिनाको अन्तिम सोमबार भगवान श्री महादेवको भव्य रथयात्रा कार्यक्रम सम्पन्न भएको छ। निखिलरञ्जन दामको प्रमुख नेतृत्व र आतिथ्यमा सम्पन्न यस कार्यक्रम विद्यालय परिसरलाई धार्मिक र सांस्कृतिक रंगमा रङ्गिएको थियो।

कार्यक्रमको सुरुवात विद्यालयका संस्थापक प्रिन्सिपल परशुराम भण्डारी (पिआर) को स्वागत तथा शुभकामना मन्तव्यबाट भएको थियो। उनले विद्यार्थीसँग श्रावण महिनाको धार्मिक महत्व, भगवान भोलेनाथको महिमा, र हाम्रो जीवनमा संस्कारको भूमिका बारे प्रेरणादायी सन्देश दिएका थिए। प्रिन्सिपल भण्डारीले भने, “शिक्षा केवल किताबमा सीमित हुँदैन, संस्कार र मूल्यबोधले मात्र शिक्षा पूर्ण हुन्छ। आजको यो कार्यक्रम विद्यार्थीको मनमा धर्म, आस्था र नैतिकताको बीउ रोप्ने उद्देश्यले आयोजना गरिएको हो।”

कार्यक्रममा शिव ताण्डव नृत्य, भजन–कीर्तन, र भगवान शिवजीको स्तुति गानजस्ता संस्कारिक प्रस्तुतीहरूले वातावरण भक्तिमय बनाएको थियो। कलाकारहरूको जीवन्त प्रस्तुतीमा विद्यार्थीहरू उत्साहित र रमाइलो मुद्रामा देखिन्थे। धार्मिक धुन र भजनको स्वरले विद्यालय परिसरमा आस्था र उमङ्गको अद्वितीय मिश्रण ल्याएको थियो।

श्रावण महिनाको अन्तिम सोमबार, विशेषगरी भगवान शिवको आराधनाका लागि अत्यन्त महत्वपूर्ण दिन मानिन्छ। यस दिनको धार्मिक तथा आध्यात्मिक पक्षबारे प्रिन्सिपल भण्डारीले विद्यार्थीसँग विस्तृत चर्चा गर्दै, आस्था र विश्वासले जीवनलाई कसरी सकारात्मक र अनुशासित बनाउँछ भन्ने उदाहरणहरू प्रस्तुत गरेका थिए।

विद्यालयले यस कार्यक्रममार्फत विद्यार्थीसँग केवल शैक्षिक ज्ञान मात्र नभई धर्म, संस्कृति, र परम्पराको गहिरो महत्व बुझाउने प्रयास गरेको स्पष्ट देखिन्थ्यो।