पहलमानपुर : कैलालीको पहलमानपुरस्थित कलम बम मेमोरियल स्कुलमा आयोजित स्काउट दिवस विशेष कार्यक्रमले विद्यार्थीमा नैतिक शिक्षा र सामाजिक चेतना अभिवृद्धिमा स्काउटको महत्त्वलाई पुनः उजागर गरेको छ। कार्यक्रमका प्रमुख अतिथि, प्रदेश प्रमुख नजिर मियाँले स्काउट गतिविधिहरूले समाजमा सकारात्मक सन्देश फैलाइरहेको र विद्यार्थीहरूलाई सामाजिक विषयवस्तु बुझ्न तथा नैतिक ज्ञान आर्जन गर्न महत्त्वपूर्ण सहयोग पुर्याएकोमा खुसी व्यक्त गरे।
घोडाघोडी नगरपालिकाका नगरप्रमुख खडक रावतले मानव विकासलाई प्राथमिकतामा राखेर स्काउटले गरिरहेका गतिविधिहरूको प्रशंसा गरे। उनले स्काउटले असल नागरिक निर्माणमा गरिरहेको योगदानको खुलेर सराहना गरे। त्यस्तै, स्काउट सुदूरपश्चिम प्रदेशका प्रमुख आयुक्त नरेन्द्र थापाले प्रदेशभरिका जिल्लाहरूमा स्काउटको काम उच्च प्रशंसनीय रहेको उल्लेख गर्दै उज्ज्वल भविष्य निर्माणमा स्काउटको भूमिका अपरिहार्य रहेको धारणा राखे।
कार्यक्रममा वक्तृत्वकला, हाजिर जवाफ र चित्रकला प्रतियोगिताका विजेता विद्यार्थीहरूलाई पुरस्कार वितरण गरी उनीहरूको प्रतिभालाई सम्मान गरियो। घोडाघोडी नगरपालिकाका उपसचिव खगेन्द्र सिंह र स्काउट अभियानी भीम अम्मैले स्काउटको वर्तमान अवस्था र यसको भविष्यबारे विस्तृत प्रकाश पारे। विशेषगरी, भीम अम्मैलाई स्काउटका सफल अभियन्ताका रूपमा चित्रण गर्दै विशेष सम्मान गरियो, जसले घोडाघोडी क्षेत्रमा स्काउट गतिविधिलाई नयाँ उचाइमा पुर्याउन महत्त्वपूर्ण भूमिका खेलेका छन्।
कलम बम मेमोरियल स्कुलका स्काउट संरक्षक युवराज बमको अध्यक्षतामा सम्पन्न यस कार्यक्रमले स्काउटिङको महत्वलाई जनमानसमा थप स्थापित गर्न सफल भएको देखिन्छ। यस किसिमका कार्यक्रमहरूले बालबालिका तथा युवाहरूलाई अनुशासित, जिम्मेवार र समाजप्रति समर्पित नागरिक बनाउन थप प्रेरणा प्रदान गर्नेछ।
२०८२ अषाढ ५, बिहिबार
