काठमाडौँ : भारतमा गत जनवरी २९ मा भएको कुम्भ मेलाको भागदौडमा ८२ जनाको मृत्यु भएको बीबीसीले खुलासा गरेको छ। बीबीसीले सार्वजनिक गरेको एक रिपोर्टमा सरकारले ३७ जनाको मात्र मृत्यु भएको दाबी गरे पनि आफूले ८२ जनाको मृत्यु भएको प्रमाण जुटाएको दाबी गरेको छ।

बीबीसीको रिपोर्टअनुसार, कुम्भ मेलामा मृत्यु भएका ३७ जनाका परिवारलाई उत्तर प्रदेश सरकारले २५-२५ लाख भारतीय रुपैयाँ राहत दिएको थियो। यसबाहेक, बीबीसीले अन्य मृतकका परिवारलाई पनि २५-२५ लाख रुपैयाँ नगद सहयोग गरिएको दाबी गरेको छ। रिपोर्टमा भनिएको छ कि प्रदेश सरकारले ती मृतकहरूलाई ‘अन्य कारणले मरेको’ कागज गराएर नगद सहयोग गरेको प्रमाण फेला पारेको छ।

बीबीसीले आफ्नो रिपोर्ट तयार गर्दा कुम्भ मेलामा आफन्त गुमाएको दाबी गर्ने १०० भन्दा बढी परिवारसँग कुराकानी गरेको उल्लेख गरेको छ। यद्यपि, प्रमाणको अभावका कारण ८२ जनाको सूचीमा उनीहरू सबैलाई समावेश नगरिएको रिपोर्टमा जनाइएको छ। जनवरी १३ देखि फेब्रुअरी २६ सम्म चलेको कुम्भ मेलामा ६६ करोड मानिस सहभागी भएको दाबी गरिएको थियो। यसको आयोजना गर्न उत्तर प्रदेश सरकारले ७ हजार करोड भारतीय रुपैयाँ खर्च गरेको बताइएको छ।