काठमाडौँ : बंगलादेशमा अन्तरिम सरकारका प्रमुख मोहम्मद युनुसविरुद्धको विरोध प्रदर्शन तीव्र बनेको छ। विपक्षी दलहरू, सरकारी कर्मचारी, शिक्षक र सेनामा समेत आक्रोश बढ्दै गएको छ। यसैबीच, ढाका महानगर प्रहरीले राजधानीको केन्द्रमा हुने सबै र्याली, विरोध प्रदर्शन र सार्वजनिक सभाहरूमा अनिश्चितकालीन प्रतिबन्ध लगाएको छ।
बंगलादेशी सञ्चारमाध्यमका अनुसार ढाका प्रहरीले मोहम्मद युनुसको आधिकारिक निवास ‘जमुना गेस्ट हाउस’ र बंगलादेश सचिवालय वरपरको क्षेत्रलाई पूर्ण रूपमा सिल गरेको छ। यो कदम सचिवालयमा कार्यरत अधिकारी र कर्मचारीहरूले सरकारको अध्यादेशको विरोध गरिरहेका बेला चालिएको हो। यसअघि मे १० मा पनि सरकारले सरकारी भवनहरूको सुरक्षाका लागि सीमा सुरक्षा बल र प्रहरीको स्वाट टोली खटाएको थियो।
हाल ईद बिदाका कारण विरोध प्रदर्शन केही समयका लागि रोकिएको छ। तर, सरकारी कर्मचारीहरूले जुन १५ सम्ममा आफ्ना मागहरू पूरा नभए देशभरका सरकारी कार्यालयहरूमा ठूलो आन्दोलन गर्ने चेतावनी दिएका छन्। अगस्ट २०२४ मा सत्तामा आएको मोहम्मद युनुसको अन्तरिम सरकारलाई विपक्षी दल बंगलादेश राष्ट्रवादी पार्टी (बीएनपी) ले चुनावको समयसीमा तोक्न माग गर्दै घेराबन्दी गरेको छ। सेना प्रमुख वाकर-उज-जमानले डिसेम्बर २०२५ सम्ममा चुनाव गराउन सल्लाह दिएका छन्। तर, युनुसले अप्रिल २०२६ मा चुनाव गराउने संकेत गरेका छन्, जसले सत्तामा उनको बसाइ लम्ब्याउने मनसायमाथि शंका बढाएको छ। सरकारी कर्मचारीहरूसँगै देशभरका हजारौं प्राथमिक विद्यालयका शिक्षकहरूले पनि तलब वृद्धि लगायतका विभिन्न माग राख्दै अनिश्चितकालीन हडतालमा उत्रिएका छन्। यसले युनुस सरकारमाथि चौतर्फी दबाब बढेको देखाउँछ।
२०८२ जेष्ठ २७, मंगलबार
