काठमाडौँ : अमेरिकी राजनीतिमा एक नयाँ र रोचक टकराव देखिएको छ, जहाँ पूर्व राष्ट्रपति डोनाल्ड ट्रम्प र अर्बपति एलन मस्क आमनेसामने भएका छन्। यो विवाद ट्रम्पको प्रस्तावित ‘बिग ब्युटिफुल बिल’ लाई लिएर बढेको हो, जसले अमेरिकाको आर्थिक भविष्य र ट्रम्पको विरासतमा गम्भीर असर पार्न सक्छ।
डोनाल्ड ट्रम्पले हालै एलन मस्कसँगको आफ्नो सम्बन्ध समाप्त भएको घोषणा गर्दै मस्कले विपक्षी डेमोक्र्याटहरूलाई समर्थन गरेमा गम्भीर परिणाम भोग्नुपर्ने चेतावनी दिएका छन्। यो चेतावनी मस्कले ट्रम्पको महत्त्वाकांक्षी विधेयकको खुलेर विरोध गरेपछि आएको हो।
‘बिग ब्युटिफुल बिल’ मे २२ मा अमेरिकी कंग्रेसको तल्लो सदन प्रतिनिधि सभामा केवल १ मतको अन्तरले (२१५-२१४) पारित भएको थियो। यो विधेयक अहिले सिनेटमा विचाराधीन छ र जुलाई ४, २०२५ सम्ममा पारित हुनुपर्नेछ। ट्रम्पले यसलाई ‘देशभक्तिले भरिएको’ कानूनको रूपमा प्रस्तुत गर्दै यसले अमेरिकामा लगानी बढाउने र चीनमाथिको निर्भरता घटाउने दाबी गरेका छन्।
तर, एलन मस्कले यसलाई पूर्ण रूपमा फरक दृष्टिकोणबाट हेरेका छन्। उनले यस विधेयकलाई ‘बेकारको खर्चले भरिएको’ र सरकारी अनुदान वितरण गर्ने ‘लुट कागजात’ भन्दै यसले राष्ट्रिय घाटा २.५ ट्रिलियन डलरले बढाउने दाबी गरेका छन्। मस्कले यो बिल पारित हुनबाट रोक्न ३ जना रिपब्लिकन सांसदहरूलाई आफ्नो पक्षमा पारिसकेका छन् र २०२६ को मध्यावधि चुनावमा विधेयकलाई समर्थन गर्ने रिपब्लिकन सांसदहरूविरुद्ध विरोध गर्ने चेतावनी समेत दिएका छन्।
मस्कको यो अप्रत्याशित हस्तक्षेपले ट्रम्पको लागि चुनौती थपिदिएको छ। रान्ड पल, रोन जोनसन र माइक ली जस्ता केही प्रभावशाली रिपब्लिकन सिनेटरहरूले खुलेआम मस्कको समर्थन गर्दै विधेयकमा परिवर्तन चाहेको र यसको विरुद्धमा मतदान गर्ने बताएका छन्।
यो विधेयकले विद्युतीय सवारी साधन र सौर्य ऊर्जाको लागि बाइडेन सरकारले दिएको कर छुट समाप्त गर्ने प्रस्ताव गरेको छ, जसले मस्कको कम्पनी टेस्लालाई प्रत्यक्ष रूपमा हानि पुर्याउन सक्ने देखिन्छ। अमेरिकी सिनेटमा रिपब्लिकनहरूको ५३-४७ को बहुमत छ। ३ जना सिनेटरहरूले पहिले नै विधेयकको विरुद्धमा मतदान गर्ने बताएपछि अवस्था ५०-५० मा आइपुगेको छ। यदि थप १ जना सांसदले पनि यो विधेयकको विरुद्धमा मतदान गरे भने, ट्रम्पले यो विधेयक पारित गराउन सक्ने छैनन्।
मस्कको विरोधका बाबजुद पनि ट्रम्पले यो विधेयक पारित गराउन अथक प्रयास गरिरहेका छन्। उनले धेरै सिनेटरहरूसँग भेटघाट र फोनमा कुरा गरी उनीहरूलाई विधेयकको समर्थनमा मतदान गर्न मनाउने प्रयास गरिरहेका छन्। यदि यो विधेयक सिनेटमा पारित भएन भने, यसलाई प्रतिनिधि सभामा फेरि एक पटक पारित गर्नुपर्ने हुन्छ, जहाँ ट्रम्पले यसअघि केवल १ मतको अन्तरले मात्र पारित गराउन सफल भएका थिए।
अमेरिकी राजनीतिको यो नयाँ अध्यायले आगामी दिनमा थप रोचक मोड लिने निश्चित छ। के मस्कले ट्रम्पको महत्त्वाकांक्षी आर्थिक योजनालाई असफल पार्न सक्लान् वा ट्रम्पले आफ्नो विधेयक पारित गराउन सफल होलान्, त्यो हेर्न बाँकी नै छ।
२०८२ जेष्ठ २६, सोमबार
