काठमाडौँ : अमेरिका जान सपना देखिरहेका वा त्यहाँ बसिरहेका नेपालीहरूका लागि काठमाडौँस्थित अमेरिकी दूतावासले एक ‘कडा’ र ‘अन्तिम’ चेतावनी जारी गरेको छ। स्वीकृत बसाइ अवधि नाघेर अमेरिकामा बसिरहेको पाइएमा अब ‘देश निकाला’ मात्र होइन, ‘सधैँका लागि अमेरिका प्रवेशमा प्रतिबन्ध’ लगाइने कठोर नीति सार्वजनिक गरिएको छ। यो घोषणाले नेपाली समुदायमा तरंग पैदा गरेको छ।
ट्रम्पको ‘कठोर’ नीति र दूतावासको ‘आक्रामक’ सूचना
डोनाल्ड ट्रम्पले दोस्रोपटक राष्ट्रपति बनेयता अमेरिकाले आप्रवासन नीतिमा ‘अभूतपूर्व’ कडाइ गरेको छ। यसैको प्रत्यक्ष प्रभावका रूपमा काठमाडौँस्थित अमेरिकी दूतावासले पनि बेलाबेला ‘आक्रामक’ सूचनाहरू जारी गर्दै आएको छ। बुधबार जारी गरिएको पछिल्लो सूचनाले यस कडाइको चरम रूपलाई उजागर गरेको छ।
दूतावासले स्पष्ट शब्दमा चेतावनी दिँदै भनेको छ: ‘यदि तपाईं स्वीकृत बसाइ अवधि नाघेर अमेरिकामा बसिरहनुहुन्छ भने तपाईंलाई देश निकाला गरिन सक्नेछ र भविष्यमा अमेरिका यात्रा गर्न स्थायी रूपमै प्रतिबन्ध लाग्न सक्छ।’ यो भनाइले ‘अवैध’ रूपमा बस्नेहरूका लागि अब अमेरिकाको ढोका सधैँका लागि बन्द हुने संकेत गरेको छ।
भविष्यको ढोका बन्द: नेपालीलाई गम्भीर असर
यो चेतावनीले अमेरिकामा विभिन्न भिसामा गएर ‘ओभरस्टे’ गरिरहेका हजारौँ नेपालीहरूलाई प्रत्यक्ष असर पार्ने देखिन्छ। यसअघि पनि यस्ता चेतावनीहरू आउने गरे पनि ‘स्थायी प्रतिबन्ध’ को भाषाले यसपटकको सूचनाको गम्भीरतालाई थप बढाएको छ। अब अमेरिका जान चाहने जो कोहीले पनि भिसा नियमको पालना नगरे ‘कालोसूचीमा’ पर्ने र भविष्यमा कहिल्यै अमेरिका प्रवेश गर्न नपाउने जोखिम बढेको छ।
अमेरिकी सरकारको यो ‘शून्य सहनशीलता’ नीतिले आप्रवासनमा कडाइको स्पष्ट सन्देश दिएको छ, जसले नेपाली समुदायलाई भिसा नियमको पूर्ण पालना गर्न र कुनै पनि हालतमा ‘ओभरस्टे’ नगर्न बाध्य पारेको छ। अन्यथा, ‘अमेरिकी सपना’ सधैँका लागि ‘दुःस्वप्न’ मा परिणत हुन सक्नेछ।
२०८२ जेष्ठ ७, बुधबार
