काठमाडौं: संघीय संसदमा जारी गतिरोध अन्त्यका लागि सभामुखले पहल गरे पनि प्रतिपक्षी दलहरू राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा) भने आन्तरिक छलफलमा जुटेका छन्। यसैकारण आज बिहान ११ बजेका लागि तय भएको प्रतिनिधिसभा बैठक केही ढिला गरी बस्ने भएको छ।
रास्वपाले भिजिट भिसा प्रकरणमा गृहमन्त्री रमेश लेखकले राजीनामा दिनुपर्ने र छानबिन समिति तत्काल बनाउनुपर्ने अडान राखेर संसद अवरुद्ध गर्दै आएको छ। यसअघि शुक्रबारको बैठकमा पनि गृहमन्त्रीले जवाफ दिने क्रममा रास्वपाका सांसदहरूले वेल घेरेर नाराबाजी गरेका थिए।
सदनको प्रमुख प्रतिपक्षी दल नेकपा (माओवादी केन्द्र) संसद खोल्न तयार भए पनि रास्वपाले भने अवरोध जारी राख्ने घोषणा शुक्रबारको बैठकमा नै गरेको थियो। शुक्रबारको बैठकमा रास्वपाले नाराबाजी गर्दा राप्रपाका सांसदहरू भने आ-आफ्नो सिटमा बसेका थिए। यसले प्रतिपक्षी दलहरूबीच पनि संसद सञ्चालनबारे समान धारणा नरहेको देखाउँछ।
संसद बैठक सुरु हुनुअघि आज आइतबार रास्वपा र राप्रपा दुवै दल बानेश्वरमा छुट्टाछुट्टै आन्तरिक छलफलमा जुटेका छन्। रास्वपाका प्रमुख सचेतक सन्तोष परियारले पार्टीको संसदीय दलको अनौपचारिक छलफल भइरहेको जानकारी दिए। उनले “संसदमा के गर्ने भन्ने विषयमा रणनीति बनाउन आन्तरिक छलफलमै छौं” भनी सेतोपाटीसँग बताएका छन्।
दुई प्रतिपक्षी दलहरूबीचको यो छलफल र उनीहरूको आगामी रणनीतिले आजको संसद बैठकको दिशा निर्धारण गर्नेछ। सभामुख देवराज घिमिरेका प्रेस सल्लाहकार शेखर अधिकारीले संसद बैठक केही ढिला हुने जानकारी दिएका छन्। संसदमा जारी यो गतिरोधले बजेटमाथिको छलफल लगायतका महत्वपूर्ण कार्यसूचीहरू प्रभावित भइरहेका छन्। आजको छलफलले संसदको अवरोध हटाउन सहयोग पुग्ला त?
२०८२ अषाढ १, आईतबार
