काठमाडौँ: काठमाडौँ महानगरपालिकाका प्रमुख बालेन्द्र शाह (बालेन) र उपप्रमुख सुनिता डंगोलबीच कार्यपालिका र नगरसभा बैठक सञ्चालन गर्नेबारे छलफल भएको छ। उनीहरूबीच औपचारिक रुपमा पाँच महिनापछि भेटघाट र छलफल भएको हो।
महानगर स्रोतका अनुसार, “मेयर, उपमेयर र केही वडा अध्यक्षहरूबीच बुधबार महानगरको कार्यपालिका बैठक बोलाउने र बजेटमा के कसरी गर्ने भन्नेबारे छलफल भयो।” स्रोतले थप्यो, “मेयर र उपमेयर गत पुसपछि पहिलोपटक औपचारिक रुपमा यसरी छलफल भएको हो।” यसअघि कार्यपालिकाको बैठक पुस १४ गते बसेको थियो।
मेयर र उपमेयरसँगको यस छलफलमा नेकपा एकीकृत समाजवादीका वडा नम्बर १५ का अध्यक्ष ईश्वरमान डंगोल, प्रवक्तासमेत रहेका वडा नम्बर १७ का कांग्रेसका अध्यक्ष नवीन मानन्धर र वडा नम्बर ३२ का अध्यक्ष एमालेका नवराज पराजुली पनि सहभागी थिए।
यसअघि प्रमुख प्रशासकीय अधिकृत सरोज गुरागाईंलाई महानगरमा हाजिर गर्न दिने वा नदिने विषयमा मेयर र उपमेयरबीच विवाद उत्पन्न भएको थियो। पछि बहुमत वडा अध्यक्ष र कर्मचारीहरूको साथमा उपप्रमुख डंगोलले गुरागाईंलाई महानगरमा हाजिर गर्ने वातावरण बनाएकी थिइन्। यो छलफलले महानगरपालिकाको कार्यसम्पादनमा देखिएको गतिरोध हटाउन मद्दत पुग्ने अपेक्षा गरिएको छ।
२०८२ जेष्ठ २९, बिहिबार
