काठमाडौँ : अमेरिकाले इरानलाई नयाँ आणविक सम्झौताको प्रस्ताव पठाएको छ। इरानका विदेशमन्त्री अब्बास अराघचीले ओमानका विदेशमन्त्री बद्र बिन हम्माद अल-बुसैदीसँग तेहरानमा भएको भेटका क्रममा अमेरिकी प्रस्तावका केही महत्त्वपूर्ण बुँदाहरू प्राप्त गरेको बताएका हुन्।

यो प्रस्ताव संयुक्त राष्ट्रसंघको आणविक एजेन्सीले इरानले आणविक हतियार बनाउन प्रयोग गरिने युरेनियमलाई बढी मात्रामा समृद्ध गर्न थालेको प्रतिवेदन सार्वजनिक गरेको समयमा आएको छ। यसले अन्तर्राष्ट्रिय समुदायमा इरानको आणविक कार्यक्रमलाई लिएर चिन्ता बढाइरहेका बेला अमेरिकाले कूटनीतिक पहल गरेको देखिन्छ।

ह्वाइट हाउसकी प्रवक्ता क्यारोलिन लेभिटले यो सम्झौता स्वीकार गर्नु इरानको हितमा हुने प्रतिक्रिया दिएकी छन्। उनले अमेरिकी राष्ट्रपति ट्रम्पको स्पष्ट अडान दोहोर्याउँदै भनिन्, “राष्ट्रपति ट्रम्पले स्पष्ट रूपमा भनेका छन् कि इरानलाई कहिल्यै आणविक बम बनाउन दिइने छैन।” लेभिटका अनुसार, यो प्रस्ताव अमेरिकी राष्ट्रपति ट्रम्पका मध्यपूर्वका लागि विशेष दूत स्टीव विटकफले तयार पारेका हुन्।

इरानका विदेशमन्त्री अब्बास अराघचीले भने आफ्नो देशको सिद्धान्त, जनताको हित र अधिकारलाई ध्यानमा राखेर यस प्रस्तावको जवाफ दिने बताएका छन्। यसबाट इरानले अमेरिकी प्रस्तावलाई गम्भीरतापूर्वक लिँदै आफ्नो राष्ट्रिय स्वार्थलाई केन्द्रमा राखेर निर्णय गर्ने संकेत मिलेको छ।