काठमाडौँ : राष्ट्रिय स्वतन्त्र पार्टी (रास्वपा) ले नेपाली कांग्रेस र नेकपा एमालेको सत्ता गठबन्धनमाथि गम्भीर प्रश्न उठाएको छ। रास्वपाका प्रवक्ता मनिष झाले आइतबारको केन्द्रीय समितिको बैठकपछि स्पष्ट पारे – “भिजिट भिसा प्रकरणले हाम्रो दाबीलाई पुष्टि गरिदिएको छ। यो गठबन्धन भ्रष्टाचार र तस्करीको संरक्षक मात्रै हो।”
गृहमन्त्री लेखकको अध्यागमन प्रकरणले जनआक्रोश उत्कर्षमा पुगेको बेला, रास्वपाले संसद् र सडक दुवै स्थानबाट कडा प्रतिकारको चेतावनी दिएको छ। प्रवक्ता झाले कटाक्ष गरे – “पुराना दलका लागि प्रमाणित हुनुपर्ने, नयाँ दललाई चाहिँ दर्ता भएसँगै थुन्ने? यो कस्तो दोहोरो मापदण्ड?”
रास्वपाले गृहमन्त्रीको राजनीतिक छाड्ने प्रतिबद्धतालाई पनि कडा रूपमा औंल्याएको छ। “कर्मचारीले बदमासी गरेको छ भने मन्त्रीलाई किन उन्मुक्ति? मन्त्री विन्डोमा बसेर अध्यागमनको कारोबार चलाउने हो? कसको पालामा भयो? सरुवा विधिअनुसार भयो कि होइन?” प्रवक्ता झाले तीखे प्रश्न गर्दै सरकारको नैतिकता शून्य भएको बताए।
सर्वोच्च अदालतको रवि लामिछानेसम्बन्धी आदेशमाथि पनि रास्वपाले चर्को आलोचना गर्दै कानुनी त्रुटिलाई सार्वजनिक बहसको विषय बनाउने चेतावनी दिएको छ। “सर्वोच्च आफैंले त्रुटि सच्याइसक्यो। अदालतले नै असन्तुलन हुन नदिएर आफ्नो सम्मान बचाउनुपर्छ,” उनले भने।
रास्वपाले सरकारले आफूअनुकूल फैसला गराउन खोजेको संकेत पनि दिएको छ। संसदमा मुद्दा सामान्य नहुने भन्दै रास्वपाले अर्को चरणको आन्दोलनको सम्भावना पनि औंल्याएको छ। “सुशासनका लागि सडकमा उत्रनुपर्ने अवस्था आउँछ,” प्रवक्ता झाले सरकारलाई दोहोरो चेतावनी दिएका छन्।
यसरी रास्वपाले सत्ता गठबन्धनमाथि गरेको यो प्रहार सत्ताको रक्षा कि दण्डहीनताको बचाउ? यो प्रश्नले अहिले राजनीतिक वृतमा तरंग ल्याएको छ।
२०८२ जेष्ठ ११, आईतबार
