काठमाडौ : २०८४ सालको चुनावमा नेकपा (एमाले) लाई स्पष्ट बहुमत दिलाउने लक्ष्यका साथ काम गर्न प्रधानमन्त्री तथा एमाले अध्यक्ष केपी शर्मा ओलीले पार्टीका जनप्रतिनिधिहरूलाई आग्रह गर्नुभएको छ। ललितपुरमा आयोजित बागमती प्रदेशस्तरीय जननिर्वाचित वडाध्यक्षहरूको प्रशिक्षण कार्यक्रम उद्घाटन गर्दै उहाँले सो कुरा बताउनुभएको हो।
जनसम्बन्ध सुदृढ गर्न प्रधानमन्त्रीको जोड
प्रधानमन्त्री ओलीले जनप्रतिनिधिहरूलाई जनता र पार्टीसँगको घनिष्ठ सम्बन्ध सुदृढ गर्न र विकास तथा सुशासनका लागि काम गर्न आग्रह गर्नुभयो। उहाँले निर्वाचित पालिका प्रमुख, उपप्रमुखहरूलाई अन्य पार्टी र पक्षहरूसँग पनि राम्रो सम्बन्ध कायम गरी काम गर्न निर्देशन दिनुभयो। ओलीले निर्वाचन जितेपछि पार्टीसँगको सम्बन्ध तोडिनु नहुनेमा जोड दिँदै पार्टीका नीति र निर्देशन पालना गरेर देश र जनताको सेवामा सक्रिय रहन आग्रह गर्नुभयो।
अध्यक्ष ओलीले एमाले वास्तविक जनतन्त्र, देशको स्वाधीनता र भौगोलिक अखण्डताका पक्षमा दृढ भएर लाग्ने पार्टी भएको बताउनुभयो। उहाँले तथाकथित वामपन्थीहरूले एमालेलाई कमजोर बनाउने षड्यन्त्र गरे पनि ती सबैलाई चकनाचुर पारेर अगाडि बढेको दाबी गर्नुभयो। कम्युनिष्ट एकताको नाममा पार्टी विभाजन गरी एमालेको देश बनाउने अभियान रोक्न खोजिएको र एमालेमाथिको आक्रमण देशकै विरुद्धको आक्रमण भएको उहाँको भनाइ थियो।
‘प्रचण्ड, माधव र झलनाथको षड्यन्त्र’
ओलीले पुष्पकमल दाहाल ‘प्रचण्ड’, माधव नेपाल र झलनाथ खनाललाई एमालेविरुद्ध षड्यन्त्र गरेको आरोप लगाउनुभयो। उहाँले प्रचण्डमाथि कम्बोडियामा लगानी रहेको हल्ला फिँजाएको आरोप लगाउँदै माधव नेपाल र झलनाथ खनालले पार्टी प्रमुख हुँदा प्रभावकारी रूपमा चलाउन नसकेको र पार्टी कब्जा गर्न खोजेको बताउनुभयो। ओलीले ‘निकम्मा, बेठीक र परनिर्भर’ नेतृत्व विस्थापन गरी ‘समृद्ध नेपाल, सुखी नेपाली’ को राष्ट्रिय आकाङ्क्षाका साथ पार्टीलाई अगाडि बढाउँदा उनीहरूलाई चित्त नबुझेको बताउनुभयो।
प्रतिगामी तत्त्व र भ्रम चिर्न आग्रह
राजतन्त्र फर्कने कुनै आधार नभए पनि प्रतिगामी तत्त्वहरू सल्बलाएको भन्दै ओलीले एमाले कार्यकर्तालाई मनोबल नगिराउन आग्रह गर्नुभयो। उहाँले जनतालाई रैती बनाउन खोज्नेहरूले फैलाउने भ्रम चिर्न र जेठ १५ गते प्रतिगामीहरूले गर्ने प्रदर्शनको विपक्षमा तयारी रहन निर्देशन दिनुभयो।
ओलीले भ्रष्टाचारी र सहकारी पीडितहरूले उल्टै भ्रष्टाचारको विरोध र सहकारीलाई न्याय दिने जस्ता आवाज उठाएर जनतामा भ्रम छरेको आरोप लगाउनुभयो।
प्रधानमन्त्री ओलीले २०६४ सालमा माओवादीले आफ्ना लडाकू क्याम्पमा राखेर र मार्चपास गराएर जनतालाई तर्साएर आतंकको राज गरेकाले आफूहरू पराजित भएको स्मरण गर्नुभयो। तर, अब २०६४ सालको जस्तो परिणाम नआउने र माओवादी पनि बलियो नभएको स्पष्ट पार्नुभयो। उहाँले एमाले नै मुलुकको मजबुत पार्टी भएको र देशलाई विकास र सुशासनको नेतृत्व दिने सामर्थ्य आफूहरूसँग भएको बताउनुभयो। त्यसैले, अल्मलमा नपरी, विभाजन नभई शक्ति सुदृढ गर्दै २०८४ को चुनावमा पार्टीलाई स्पष्ट बहुमतमा ल्याउने मिसनका लागि जुट्न उहाँले आग्रह गर्नुभयो।
२०८२ जेष्ठ ११, आईतबार
