काठमाडौं : त्रिभुवन अन्तर्राष्ट्रिय विमानस्थलको अध्यागमन कार्यालयमा हालै भएको भनिएको एउटा घटनाले सञ्चारमाध्यम र सामाजिक सञ्जालमा ठूलो चर्चा पाएको छ। यस विषयमा फैलिएका विभिन्न समाचार र हल्लाहरूप्रति गृह मन्त्रालयले गम्भीर ध्यानाकर्षण भएको जनाएको छ।
गृह मन्त्रालयले मंगलबार एक प्रेस विज्ञप्ति जारी गर्दै यी समाचारहरू ‘भ्रामक, आधारहीन र तथ्यहीन’ रहेको बताएको छ। मन्त्रालयले ‘एकपक्षीय र नियोजित’ खबरहरू नछाप्न र ‘सत्य तथ्य मात्र प्रचारप्रसार गर्न’ सबैलाई आग्रह गरेको छ। विज्ञप्तिमा मन्त्रालयको नेतृत्वमा कुनै पनि गैरकानुनी वा असंवैधानिक काम नगरिएको र भविष्यमा पनि नगरिने स्पष्ट पारिएको छ। गृह मन्त्रालय सुशासन कायम राख्न र अपराध विरुद्ध ‘शून्य सहनशीलता’ को नीतिमा काम गरिरहेको जनाइएको छ।
विज्ञप्तिमा गृह मन्त्रालयले विमानस्थल अध्यागमन कार्यालयमा भएको भनिएको घटनाको सम्बन्धमा अख्तियार दुरुपयोग अनुसन्धान आयोगले अनुसन्धान गरिरहेको जानकारी दिएको छ। मन्त्रालयले अख्तियारलाई पूर्ण सहयोग गरिरहेको पनि उल्लेख गरेको छ। यो विज्ञप्तिमा गृह मन्त्रालयका सहसचिव छवि रिजालको हस्ताक्षर रहेको छ। यो घटनाबारे अख्तियारको अनुसन्धानले थप सत्यतथ्य बाहिर ल्याउने अपेक्षा गरिएको छ।
२०८२ जेष्ठ १०, शनिबार
