काठमाडौं : नेपाली कांग्रेसका महामन्त्री विश्वप्रकाश शर्मा यतिखेर विश्वको सर्वोच्च शिखर सगरमाथाको तेस्रो क्याम्पमा छन्, जहाँ नियतिको खेल सुरु भएको छ। बेसक्याम्पसम्मको सामान्य यात्रा सोचेका शर्माले अचानक सगरमाथाको चुचुरो चुम्ने महत्त्वाकांक्षा पालेका थिए। तर, प्रकृतिले उनको परीक्षा लिँदै छ।
शर्मा सगरमाथाको शिखरबाट करिब डेढ किलोमिटर (१५०० मिटर) मात्र तल छन्, तर हिमालको मौसमले उनलाई भीषण चुनौती दिएको छ। मे २९ मा आरोहण बन्द हुने समय नजिकिँदै गर्दा, केवल ६ दिनको समय बाँकी छ। चैतमा नै बेसक्याम्प पुगेका अन्य आरोहीहरू अहिले कोही चुचुरोमा छन्, कोही तेस्रो/चौथो क्याम्पमा पालो कुरिरहेका छन्। वैशाख २७ मा “सेमिफाइनल” भन्दै बेसक्याम्प पुगेका शर्मा, अहिले क्याम्प ३ मा अडिएका छन्। अब अगाडि बढ्ने कि फर्कने भन्ने दोधारमा उनी आफ्ना शेर्पा साथीहरूसँग घनिभूत परामर्शमा छन्।
मनोबल उच्च, तर चिन्ताको धुन:
शर्माले फेसबुकमा लेखेको स्टाटसमा आफ्नो मनोबल उच्च रहेको र स्वास्थ्य अवस्था पनि ठीक रहेको जानकारी दिएका छन्। तर, यता काठमाडौंमा उनकी पत्नी कविता शर्माको मनमा भने भुइँचालो गएको छ। उनी भन्छिन्, “उहाँ तेस्रो क्याम्पमा हुनुहुन्छ र अभ्यास गर्दै हुनुहुन्छ। तर, मौसम ठीक छैन भन्नुभएको छ।” भारतीय सेनाको एक अनुभवी टोली पनि प्रतिकूल मौसमका कारण ७२०० मिटरको क्याम्प ३ बाटै फर्किएको खबरले चिन्ता अझ बढाएको छ। विश्वप्रकाशले आज र भोलिको अवस्था हेरेर मात्रै निर्णय लिने बताएका छन्। श्रीमती कविताले दुई जना अनुभवी शेर्पा गाइडहरूको सल्लाह मानेर मात्रै अगाडि बढ्न सुझाएकी छन्।
पत्नीको आँसु: सगरमाथामा जीवनको मोल
विश्वप्रकाशको यो यात्राले पत्नी कविताको मनमा गहिरो छटपटी ल्याएको छ। बेसक्याम्पबाट माथि चढ्दा फोन र इन्टरनेट सम्पर्क विच्छेद हुँदा उनले “जीवनकै सबैभन्दा ठूलो छटपटी, डर र चिन्ता” महसुस गरेको सामाजिक सञ्जालमा लेखेकी छन्। दुई दिनपछि कुरा हुँदा आँसु लुकाएर कुरा गर्नुपरेको क्षणले उनको पीडा झल्काउँछ। कविताले सगरमाथाको चुचुरोमा नपुग्न आग्रह गर्दै अर्को सिजनमा थप तयारीका साथ जान सुझाएकी छन्। तेन्जिङ शेर्पाले सातौँ पटकमा आरोहण गरेको उदाहरण दिँदै उनले परिवारको पूर्ण साथ रहने प्रतिबद्धता व्यक्त गरेकी छन्। तर, “मौसम प्रतिकूल हुँदाहुँदै जाने कुरामा चाहिँ गम्भीर भएर सोच्नु होला” भन्ने उनको आग्रहले सगरमाथाको जोखिमप्रति उनको गहिरो चिन्ता प्रकट गर्छ।
श्रीमान्–श्रीमतीको सम्बन्धलाई “जीवन रहेसम्मको सबैभन्दा नजिकको साथी” को संज्ञा दिँदै उनले आफ्नो श्रीमान्का हरेक कठिन परिस्थितिहरू आफूले पलपल महसुस गरिरहेको बताएकी छन्। भगवान्सँग प्रार्थना गर्दै र विश्वप्रकाशको आत्मबलमा विश्वास राख्दै उनले बाँकी यात्रा सहज रहने कामना गरेकी छन्। महामन्त्री विश्वप्रकाश शर्मा अब कुन निर्णयमा पुग्छन्, त्यो हेर्न बाँकी छ। शिखरको मोहले उनलाई तान्छ कि परिवारको मायाले सुरक्षित अवतरणको बाटो देखाउँछ, यो समयले नै बताउनेछ।
२०८२ जेष्ठ ९, शुक्रबार
