काठमाडौँ : नेपालको सार्वभौम संसदको ‘गरिमा’ माथि यतिबेला ‘विदेशी’ चुनौती थपिएको छ! प्रतिनिधि सभा अन्तर्गतको सार्वजनिक लेखा समितिमा पोखरा विमानस्थल निर्माणमा भएको ‘भ्रष्टाचार’ प्रकरणबारेको संसदीय उपसमितिले पेश गरेको प्रतिवेदनमाथि छलफल चलिरहँदा, एक चिनियाँ कम्पनीले उक्त प्रतिवेदनमाथि प्रश्न उठाउँदै जारी गरेको विज्ञप्ति ‘राष्ट्रिय दैनिक’ गोरखापत्रमा छापिएपछि राष्ट्रिय स्वतन्त्र पार्टी (रास्वपा) ‘आगो’ भएको छ। समितिका सदस्य एवम् रास्वपाका सांसद मनिष झाले बुधबारको बैठकमा ‘कडा’ आपत्ति जनाउँदै गोरखापत्र र ठेकेदार कम्पनी दुवैलाई ‘स्पष्टीकरण’ सोध्न माग गरेका छन्।
सांसद झाको आक्रोशको मुख्य निशाना नेपाली जनताको करले सञ्चालित ‘राष्ट्रिय दैनिक’ गोरखापत्रमाथि थियो। उनले ‘विदेशी’ कम्पनीको विज्ञप्ति छापिएकोमा ‘गम्भीर आपत्ति’ जनाउँदै भने, ‘नेपाली जनताको करले सञ्चालित एउटा राष्ट्रिय दैनिकमा यो विज्ञप्ति निक्लिनु यसका प्रधान सम्पादक र सम्पादकलाई हामीले स्पष्टीकरण सोध्नुपर्छ। यो सार्वभौम सदनको एउटा सम्मानित समितिको बारेमा यस्तो चुनौतीपूर्ण भाषा प्रयोग गरेको विज्ञप्ति तिमीले किन निकाल्यौ?’
झाले गोरखापत्रको ‘निष्पक्षता’ र ‘जिम्मेवारी’ माथि नै प्रश्न उठाउँदै ‘पैसा’ को प्रलोभनमा जस्तोसुकै सामग्री छाप्न तयार भएको हो कि भन्दै व्यंग्य गरे, ‘यसलाई के विज्ञप्ति प्रकाशित गर्ने पैसा मात्रै चाहिएको हो? हामीले जस्तोसुकै तस्बिर पठाइदिन सक्छौ भोलि? के छापिदिन्छ पैसा नै चाहिएको हो भने? त्यसमा करदाताको पैसाले सञ्चालित एउटा सञ्चार गृहले जिम्मेवार हुनुपर्दैन कि, यो कस्तो भाषा प्रयोग गरिएको छ, को प्रति लक्षित छ भनेर?’
ठेकेदार कम्पनीलाई ‘शक्तिको स्रोत’ माथि प्रश्न: ‘गाली गरेर जान सक्छन् है!’
सांसद झाको ‘आक्रोश’ ठेकेदार चिनियाँ कम्पनी (सीएमसी) प्रति पनि उत्तिकै थियो। उनले कम्पनीले ‘यस्तो भाषा प्रयोग गर्ने शक्ति कहाँबाट प्राप्त गर्यौ?’ भन्दै ‘कडा’ प्रश्न गरे। उनले यो घटनालाई ‘संसदीय सर्वोच्चता’ माथिको ‘खतरा’ को रूपमा व्याख्या गरे। ‘नभए माननीय सभापति ज्यू भोलि गएर जुनसुकै देशको जुनसुकै ठेकेदार कम्पनीले हामीलाई जस्तोसुकै गाली गरेर पनि जान सक्छन् है। आज हामी सचेत भइएन भने। त्यसको जिम्मेवारी अहिलेको यो समितिले लिनुपर्छ। त्यो बेला तिमी किन बोलेनौ भनेर आउँछ। त्यसैले म यसमा सबै जनाको ध्यानाकर्षण गराउन चाहान्छु।’
समितिमाथि ‘चुनौती’ र रास्वपाको ‘आधिकारिक धारणा’ को माग
रास्वपाले ठेकेदार कम्पनीले संसदीय उपसमितिको प्रतिवेदनमाथि उठाएको प्रश्नमा ‘संसदीय समितिको धारणा’ सार्वजनिक गर्न माग गरेको छ। सांसद झाले हिजोको गोरखापत्रमा प्रकाशित सीएमसीको विज्ञप्तिप्रति सबैको ध्यानाकर्षण गराउँदै भने, ‘कुनै एउटा विदेशी ठेकेदार कम्पनीले देशको सार्वभौम सदनको एउटा सम्मानित समिति आज हामी सदस्य छौँ, भोलि कोही अरु सदस्य होला। आज यो ठेकेदार कम्पनीले विज्ञप्ति निकाल्यो, भोलि कुनै अर्को ठेकेदार कम्पनीले विज्ञप्ति निकाल्ला। त्यति हल्कारुपमा हामीले यसलाई लिनु हुँदैन। यसमा जुन किसिमको भाषा प्रयोग गरिएको छ, त्यो चुनौतीपूर्ण छ। त्यसले हामीलाई चुनौती दिएको छ।’
यो घटनाले नेपालको संसदीय प्रणाली, सञ्चारमाध्यमको भूमिका र विदेशी लगानीकर्ताहरूसँगको सम्बन्धमाथि गम्भीर प्रश्नहरू खडा गरेको छ। अब गोरखापत्र र चिनियाँ कम्पनीले कसरी स्पष्टीकरण दिन्छन् र संसदले यो ‘चुनौती’ लाई कसरी सामना गर्छ, त्यो हेर्न बाँकी नै छ।
२०८२ जेष्ठ ७, बुधबार
