काठमाडौं : लामो समयदेखि अनिर्णित रहेको काठमाडौं महानगरपालिकाको कार्यपालिका बैठक आज (शुक्रबार) दिउँसो २ बजे बस्ने भएको छ। यो बैठक महानगरपालिकाको नीति तथा कार्यक्रम र बजेटलाई अन्तिम रूप दिई नगरसभामा पेस गर्ने महत्त्वपूर्ण एजेन्डाका साथ बस्न लागेको हो।
गत जेठ १२ गते महानगरपालिकाका ४१ कार्यपालिका सदस्यहरूले मेयर बालेन शाहलाई पत्र लेख्दै बैठक बोलाउन आग्रह गरेपछि यो बैठक बस्न लागेको हो। सदस्यहरूले महानगरका विकास निर्माण र दैनिक प्रशासनिक कार्यहरू प्रभावित भएको भन्दै तत्काल बैठक बोलाउन दबाब दिएका थिए।
महानगरपालिकाका अनुसार, कार्यपालिका बैठकअघि आज बिहान ११ बजे मेयर बालेन शाहको संयोजकत्वमा स्रोत अनुमान तथा बजेट निर्धारण समितिको बैठक बस्नेछ। त्यसलगत्तै उपप्रमुख सुनिता डंगोल नेतृत्वको बजेट तथा कार्यक्रम तर्जुमा समितिको बैठक पनि बस्ने कार्यक्रम छ। यी दुवै समितिले महानगरको आगामी आर्थिक वर्षको नीति तथा कार्यक्रम र बजेटको खाका तयार पार्नेछन्।
आज बस्ने कार्यपालिका बैठकले यी खाकाहरूलाई अनुमोदन गरी नगरसभामा पेस गर्ने निर्णय गर्नेछ। साथै, सोही बैठकले नगरसभाको मिति पनि तोक्ने जनाइएको छ। नगरसभाले कार्यपालिकाले पेस गरेको नीति तथा कार्यक्रम र बजेटमाथि छलफल गरी पारित गर्नेछ।
यो बैठकले काठमाडौं महानगरपालिकाको आगामी आर्थिक वर्षको दिशा निर्धारण गर्ने भएकाले यसलाई निकै चासोका साथ हेरिएको छ। लामो समयको गतिरोधपछि बस्न लागेको यो बैठकले महानगरको विकास प्रक्रियालाई गति दिने विश्वास गरिएको छ।
२०८२ अषाढ २७, शुक्रबार
