काठमाडौं : नेकपा एकीकृत समाजवादीका वरिष्ठ उपाध्यक्ष राजेन्द्र पाण्डेले सरकारलाई तत्काल निजामती विधेयक ल्याउन माग गरेका छन्। प्रतिनिधिसभा बैठकमा बोल्दै उनले उच्च पदस्थ कर्मचारीहरूले दुई वर्षको ‘कुलिङ पिरियड’ हटाउन दबाब दिएको भन्दै सरकारलाई यस्तो माग गरेका हुन्।
पाण्डेले ‘कुलिङ पिरियड’ खारेज गराउनका लागि २५ जना सचिवले संयुक्त राजीनामा दिने धम्की दिएर विधेयक ल्याउन अवरोध सिर्जना गरेको सुनिएको बताए। उनले सरकारलाई यस विषयमा खुट्टा नकमाउन र विधेयक तुरुन्त ल्याउन आग्रह गरे।
“२५ जना सचिवले राजीनामा दिन्छन् भने नयाँ सहसचिवले काम पाउँछन्। नयाँ व्यक्तिले जिम्मेवारी पाउँछन्,” पाण्डेले भने। उनले धम्कीका भरमा नीति निर्माणको काम रोक्न नहुनेमा जोड दिए।
२०८२ अषाढ ५, बिहिबार
