काठमाडौं : भिजिट भिसा प्रकरणलाई लिएर लामो समयदेखि अवरुद्ध संसद सुचारु गर्न प्रमुख प्रतिपक्षी दल नेकपा (माओवादी केन्द्र) गृहमन्त्री रमेश लेखकको राजीनामाको मागमा लचिलो बनेको छ। छानबिन समिति गठनको ग्यारेन्टी भएमा माओवादी केन्द्र सदन सुचारु गर्न तयार रहेको जानकारी प्राप्त भएको छ।
नेपाली कांग्रेसले अघि सारेको मध्यमार्गी प्रस्तावमा माओवादी केन्द्र र एकीकृत समाजवादी पार्टीले सकारात्मक प्रतिक्रिया दिएका छन्। यो प्रस्तावमा अख्तियार दुरुपयोग अनुसन्धान आयोगले अनुसन्धान पूरा गरेपछि त्रिभुवन अन्तर्राष्ट्रिय विमानस्थलको अध्यागमन प्रणाली सुधार गर्ने र विस्तृत अनुसन्धानका लागि समिति गठन गर्ने विषय उल्लेख छ।
यद्यपि, राष्ट्रिय स्वतन्त्र पार्टी (रास्वपा) ले भने गृहमन्त्री लेखकमाथि तत्काल छानबिन हुनुपर्ने अडान कायमै राखेको थियो। तर, रास्वपाका नेताहरू पनि अब गृहमन्त्रीले सदनमा नभई छानबिन समितिमा बोल्नुपर्ने बताउँदै केही नरम बनेका छन्। उनीहरूले छानबिन समिति गठन पहिला गर्नुपर्नेमा जोड दिएका छन्।
माओवादी केन्द्रका एक पदाधिकारीले भने, “पहिला छानबिन हुने सुनिश्चित हुनुपर्छ, हामी संसद अवरोध खुलाउन तयार छौं।” भिजिट भिसा प्रकरणमा गृहमन्त्री लेखकको संलग्नताको आरोप लगाउँदै विपक्षी दलहरूले लगातार संसदमा अवरोध सिर्जना गर्दै आएका थिए।
यस सहमतिले संसदमा देखिएको गतिरोध अन्त्य हुने सम्भावना बढेको छ। यद्यपि, अन्य विपक्षी दलहरू र रास्वपालाई समेत पूर्णरूपमा सहमत गराउनु अझै चुनौती रहेको देखिन्छ। छानबिन समितिको स्वरूप र त्यसको कार्यादेशका विषयमा भने अझै छलफल आवश्यक पर्नेछ।
२०८२ जेष्ठ २६, सोमबार
