काठमाडौँ : बहुचर्चित ६० किलो सुन तस्करी प्रकरणमा फरार रहेका १९ जना प्रतिवादीहरूलाई काठमाडौं जिल्ला अदालतले ३५ दिनभित्र अदालतमा हाजिर हुन सूचना जारी गरेको छ। सोमबार अदालतले उनीहरूविरुद्ध पक्राउ पुर्जी जारी भए पनि अहिलेसम्म मुद्दाको सुनुवाइमा उपस्थित नभएको भन्दै यो सूचना प्रकाशित गरेको हो।
अदालतका सूचना अधिकारी दीपककुमार श्रेष्ठका अनुसार, प्रहरीले खोजी गर्दा पनि भेटिएन र सुनुवाइ चलिरहँदा पनि अदालतमा हाजिर नभएको अवस्थामा उनीहरू बेपत्ता भएको मानिएको छ। त्यसपछि अदालतले निर्णय गरेर दैनिक पत्रिकामा सूचना प्रकाशित गरेको हो। अदालतले जेठ ११ गते नै पक्राउ पुर्जीको सूचना प्रकाशित गर्ने निर्णय गरेको थियो, जसमा बाटोको म्याद बाहेक ३५ दिनभित्र आफैं अदालतमा हाजिर हुन भनिएको छ।
के हो ६० किलो सुन प्रकरण?
२०८० साउन २ गते त्रिभुवन अन्तर्राष्ट्रिय विमानस्थल भन्सार कार्यालयबाट छुटेको ब्रेक-शुमा सुन रहेको सूचनापछि राजश्व अनुसन्धान विभागले नियन्त्रणमा लिएको थियो। भन्सार जाँच पास भइसकेको उक्त ब्रेक-शुभित्र ठूलो परिमाणमा सुन भेटिएको थियो, जसको तौल ६० किलो ७१६ ग्राम रहेको पुष्टि भएको थियो। दिलिप भुजेलको नाममा रहेको रेडी ट्रेड प्रालिले उक्त ब्रेक-शु मगाएको खुलेको थियो। विभिन्न नक्कली कम्पनी खडा गरी चीनबाट विभिन्न सामानभित्र सुन राखेर तस्करी गर्ने गरेको यस प्रकरणमा खुलेको थियो। सुरुमा राजश्व अनुसन्धान विभागले अनुसन्धान गरे पनि पछि केन्द्रीय अनुसन्धान ब्युरो (सीआईबी) ले थप अनुसन्धान गरी मुद्दा दायर गरेको थियो।
मुद्दाको अवस्था र फरार प्रतिवादीहरू
सीआईबीले २०८० भदौ ३१ गते २९ जनालाई प्रतिवादी बनाएर मुद्दा दायर गरेको थियो। सुरुमा कतिपय व्यक्तिको ठेगाना नखुलेको भन्दै उनीहरूलाई प्रतिवादी बनाइएको थिएन। दोस्रो चरणको अनुसन्धानपछि २०८१ असार १८ गते सीआईबीले ४६ जनालाई प्रतिवादी बनाएर जिल्ला अदालतमा मुद्दा दायर गर्दा २० जना पक्राउ परेका थिए भने २६ जना फरार थिए। हाल १९ जना भने बेपत्ता अवस्थामा छन्।
सूचना अधिकारी श्रेष्ठका अनुसार, तोकिएको समयभित्र प्रतिवादीहरू अदालतमा उपस्थित नभएमा उनीहरूलाई नकुरीकन अरूको हकमा मुद्दाको फैसला प्रक्रिया अघि बढ्नेछ। फरार रहेकाहरूको हकमा भने पछि छुट्टै निर्णय हुनेछ।
फरार रहेका केही मुख्य प्रतिवादीहरू:
पक्राउ पुर्जी जारी गरिएका १९ जनामध्ये ६ जना चिनियाँ नागरिक रहेका छन्। उनीहरूमा लुरोङ गोङ्बु, वाङ दाओजिङ, पेङ योङसिन, झोङ जियानहुवा, हेनेरी भन्ने झोङ जिङचुआन र पिङ लिङफेङ छन्।त्यसैगरी, नेपाली नागरिकहरूमा सिन्धुपाल्चोकका राम गुरुङ, झापाका लेखनाथ कार्की डोली, दोलखाका कुमार भुजेल, दोलखाकै विकेन्द्र भुजेल र पर्वतका जीवनकुमार गुरुङ रहेका छन्। भारतीय नागरिकहरू अभिजित तानाजी मुलिक, माही भन्ने अगोल कलप्पा कुटे र कमलकान्त कुल्थियाविरुद्ध पनि पुर्जी जारी गरिएको छ।
यसबाहेक, काभ्रेका पाल्साङ लामा, बर्दियाका जीवन चलाउने, दोलखाका दिलिप भुजेल, उदयपुरका भीमबहादुर मगर र भारतका टासी शेर्पालाई पनि हाजिर हुन अदालतले सूचना प्रकाशन गरेको छ।यो प्रकरणले नेपालमा संगठित अपराध र सुन तस्करीको जालो कति गहिरो छ भन्ने देखाउँछ। अदालतको यो सूचनाले फरार प्रतिवादीहरूलाई न्यायिक प्रक्रियामा ल्याउन थप दबाब सिर्जना गर्ने अपेक्षा गरिएको छ।
२०८२ जेष्ठ २६, सोमबार
