पहलमानपुर : बुद्ध जयन्तीको पावन अवसरमा स्वतन्त्र विद्यार्थी यूनियन, बुलबुले बहुमुखी क्याम्पसको आयोजनामा बजार सरसफाई तथा दीपप्रज्वलन कार्यक्रम सम्पन्न भएको छ। कार्यक्रममा शिक्षक, विद्यार्थी, सुरक्षाकर्मी, समाजसेवी, व्यापारी तथा स्थानीय बजारवासीको सक्रिय सहभागिता रहेको थियो।

कार्यक्रमको क्रममा बजार क्षेत्रको सरसफाई गरिनुका साथै दीप प्रज्वलन गरी भगवान गौतम बुद्धको सम्झनामा शान्तिको सन्देश प्रवाह गरियो। कार्यक्रमको सफलताका लागि योगदान दिने सम्पूर्णलाई क्याम्पसको स्वतन्त्र विद्यार्थी यूनियन (स्ववियु) तर्फबाट गहिरो आभार व्यक्त गरिएको छ।

स्ववियु सभापति बिबेक चौधरीले कार्यक्रममा सहभागी सबैप्रति धन्यवाद ज्ञापन गर्दै भने, “बुद्ध जयन्तीले शान्ति, सहिष्णुता र मानव सेवाको सन्देश दिन्छ। यस अवसरमा बजार सरसफाई तथा दीपप्रज्वलन कार्यक्रमले समाजमा सकारात्मक सन्देश प्रवाह गरेको छ।”
कार्यक्रमका क्रममा निम्न महत्वपूर्ण सन्देशहरू पनि दिइएको थियो:
कडा कानुनको कार्यान्वयन: बजार क्षेत्रमा फोहोर फाल्नेलाई जरिवाना लाग्ने जानकारी गराइयो ।
अनुशासनको महत्त्व: नागरिकहरूलाई अनुशासनमा बस्न प्रेरित गरियो।
सरकारी निगरानी: सफाइ कार्यक्रमलाई निरन्तरता दिन सरकारी निकायको निगरानी बढाउन आग्रह गरियो ।
सफाई संस्कृतिको अंश: सरसफाईलाई संस्कृतिको रूपमा लिनुपर्छ भन्ने जनचेतना फैलाइयो।
नागरिक जिम्मेवारी: सफाइमा नागरिकहरूको जिम्मेवारीको महत्त्वबारे जानकारी गराइयो।
फोहोर व्यवस्थापन: फोहोर छुट्याएर व्यवस्थापन गर्ने पद्धतिबारे जागरण अभियान सञ्चालन गरियो।
उक्त कार्यक्रममा विद्यार्थीहरूले बजार क्षेत्रमा फोहोर संकलन गरी व्यवस्थापन गरेका थिए। सुरक्षाकर्मीहरूले सुरक्षा व्यवस्थामा सहयोग पुर्याएका थिए भने समाजसेवी र व्यापारीहरूले पनि सक्रिय सहभागिता जनाएका थिए।
यस कार्यक्रमले स्थानीय समुदायमा शान्ति, स्वच्छता र अनुशासनको महत्त्वबारे व्यापक जनचेतना फैलाउन मद्दत पुर्याएको क्याम्पस परिवारको विश्वास छ। क्याम्पस प्रशासनले आगामी दिनमा यस्ता कार्यक्रमलाई थप व्यवस्थित र प्रभावकारी बनाउने प्रतिबद्धता जनाएको छ।