काठमाडौं : तराई–मधेसमा ‘हुलाकी मार्ग केन्द्रित जागरण’ अभियानलाई सफलतापूर्वक सम्पन्न गरेपछि अब माओवादी केन्द्रले मुलुककै मेरुदण्ड मानिएको मध्यपहाडी लोकमार्गमा जनजागरण अभियान सुरु गर्न लागेको छ।
अध्यक्ष पुष्पकमल दाहाल ‘प्रचण्ड’को सचिवालयका अनुसार आइतबार बसेको पार्टी पदाधिकारी बैठकले जेठ २ गतेबाट अभियान थाल्ने निर्णय लिएको हो। यो अभियान अब केवल पार्टीगत नभई राष्ट्रिय अभियानका रूपमा अघि बढ्ने बताइएको छ।
तराई–मधेस केन्द्रित अभियानले राष्ट्रिय एकताको नयाँ आयाम सिर्जना गरेकाले मध्यपहाडी अभियानले पहाड, हिमाल र तराई जोड्ने सेतुको रूपमा भूमिका खेल्ने अपेक्षा गरिएको छ।
पार्टीको निष्कर्ष छ — “जनताको एजेन्डालाई उठान गर्ने हरेक कदमले पार्टीलाई मात्र होइन, मुलुककै हितमा योगदान पुर्याएको छ। अबको यात्रा सडकको हैन, जन–मनको यात्रा हो।”
यस अभियानले भौगोलिक भिन्नता र सामाजिक विविधता सँगसँगै राष्ट्रिय एकताको आत्मा बोकेको संकेत प्रचण्ड नेतृत्वले दिएको छ।
यो अभियानले माओवादी आन्दोलनको नयाँ मोड संकेत गर्छ — जहाँ युद्धको मैदानबाट अब विकासको मार्ग हुँदै राष्ट्रिय समृद्धिको सपना देखिएको छ।
२०८२ बैशाख २२, सोमबार
