धनगढी ः ‘जनतासँग माओवादी’ नारासहित सुरु गरिएको तराई–मधेश जागरण अभियानले सुदूरपश्चिमको गाउँ–शहरसम्म पुगेर जनसंवाद, वैचारिक संप्रेषण र संगठन विस्तारको नयाँ अभ्यास सुरु गरेको छ। अभियानका क्रममा माओवादी केन्द्रका शीर्ष नेतृत्व स्थानीय बास, खानपिन र जीवनशैलीसँग घुलमिल हुँदै जनता नजिक पुगेका छन्।

झापाको कचनकेवलबाट १२ फागुनमा सुरु भई १७ वैशाखमा कञ्चनपुरको भिमदत्तनगरमा सम्पन्न यो अभियान सुदूरपश्चिमको ६ प्रतिनिधिसभा, ९ प्रदेशसभा, ९ पालिका र ४७ वडामा पुगेको थियो। अभियानको क्रममा हजारौ नागरिकसँग प्रत्यक्ष संवाद, बालबालिकाको अभिभावकत्व ग्रहण, शहीद तथा वेपत्ता परिवारसँग अन्तरक्रिया, र स्थानीय समस्याको अवलोकनजस्ता कार्यक्रमहरू गरिएको माओवादी सुदूरपश्चिम प्रदेश कमिटीले जनाएको छ।

प्रदेश इन्चार्ज गिरिराजमणि पोखरेलद्वारा जारी वक्तव्यमा जनअपेक्षा बुझ्न र पार्टीको भावी रणनीति जनआधारमै निर्माण गर्न यो अभियान निर्णायक भएको उल्लेख छ। उनले भने, “हामीले आन्दोलन मात्र होइन, अब जनजीवनसँग जोडिने ‘घरदैलो राजनीति’ सुरु गरेका छौँ।“

अभियानले जनतामा समाजवाद र सुशासनप्रति आशा जगाउँदै दलाल प्रवृत्तिको भण्डाफोर पनि गरेको माओवादीले जनाएको छ। पार्टी अध्यक्ष प्रचण्डसहितको नेतृत्वले स्थानीय जीवनशैलीमा घुलमिल हुँदै गरेको संवाद–अभियानले नयाँ राजनीतिक अभ्यासको संकेत दिएको विश्लेषकहरू बताउँछन्।