काठमाडौं— नागरिक उन्मुक्ति पार्टी (नाउपा)का संरक्षक तथा पूर्वसांसद रेशम चौधरीलाई रिहा गरिने प्रक्रिया तीव्र बन्दै गएको छ। सर्वोच्च अदालतको पछिल्लो स्पष्ट आदेशपछि उनी डिल्लीबजार कारागारबाट रिहा हुन लागेका हुन्।
यसबीच, जनमत पार्टीका अध्यक्ष डा. सीके राउतसहित उनका पार्टीका उच्च पदस्थ नेताहरू र नाउपाका कार्यकर्ता र नेता डिल्लीबजार कारागार पुगेका छन्। उनीहरू रेशम चौधरीको रिहाइ सुनिश्चित गर्न र ऐक्यबद्धता प्रकट गर्न त्यहाँ पुगेका हुन्।
यसअघि चौधरीलाई सर्वोच्च अदालतको अनधिकृत पत्रका आधारमा राष्ट्रिय प्रज्ञा प्रतिष्ठानको एक कार्यक्रममा सहभागी भइरहेका बेला पक्राउ गरिएको थियो। पक्राउपश्चात उनलाई डिल्लीबजार कारागार लगिएको थियो। तर, उक्त पत्र सर्वोच्चको आधिकारिक प्रक्रिया बिना जारी भएको पुष्टि भएपछि, अदालतले अर्को पत्र पठाउँदै तुरुन्त रिहा गर्न निर्देशन दिएको थियो।
सर्वोच्च अदालत प्रशासनले यस घटनालाई गम्भीर रूपमा लिँदै आन्तरिक छानबिन सुरु गरिसकेको छ। प्रारम्भिक सूचना अनुसार, अनधिकृत पत्र को, कसले, किन जारी गर्यो भन्ने विषयमा प्रष्टता आउन बाँकी छ।
यस घटनाले न्याय प्रणालीको विश्वसनीयता र पारदर्शितामाथि समेत प्रश्न उठेको छ। रेशम चौधरीको मुद्दा विगतदेखि नै राजनीतिक र कानुनी दृष्टिले संवेदनशील मानिँदै आएको छ। यतिबेला उनको रिहाइका लागि राजनीतिक र सामाजिक क्षेत्रबाट चासो र समर्थन बढेको देखिन्छ।
अब केही घण्टाभित्रै चौधरीलाई कारागारबाट मुक्त गरिने अपेक्षा गरिएको छ। समर्थकहरू र नजिकका नेताहरूको उपस्थितिले वातावरण उत्साहित देखिएको छ।
२०८२ बैशाख १७, बुधबार
