रौतहट : रौतहट जिल्लामा बिजुलीको तार चुँडिएर खस्दा खेत जोतिरहेका एक किसानको मृत्यु भएको छ ।
माधवनारायण नगरपालिकाको वडा नम्बर ७ मा स्थानीय बैजुलाल पण्डितले खेत जोतिरहेको अवस्थामा ११ केभीको तार चुँडिएर खस्दा उनको घटनास्थलमै मृत्यु भएको प्रहरीले जनाएको छ ।
खेत जोतिरहेको अवस्थामा करेन्टसहितको तार पण्डितमाथि खसेको थियो । उक्त करेन्ट लागेर उनीसँगै खेत जोतिरहेको एउटा गोरु पनि मरेको छ ।
बिहान पौने १२ बजेको समयमा उक्त घटना भएको प्रहरीले जनाएको छ । पहिलेदेखि नै बिजुलीको सर्ट भएर त्यहाँ आगो बल्ने गरेको तर विद्युत प्राधिकरणको लापरबाहीले समयमै मर्मत नहुँदा घटना भएको स्थानीयको आरोप छ।
