काठमाडौं : अमेरिकाबाट हालै डिपोर्ट भएर काठमाडौं आइपुगेका ३७ जना नेपालीमध्ये एकजना डाइभर्सिटी भिसा (डिभी) परेर अमेरिका गएका व्यक्ति रहेको खुलेको छ। अध्यागमन विभाग स्रोतका अनुसार, १० वर्षअघि डिभी परेर अमेरिकाको टेक्सास राज्यमा बस्दै आएका ती व्यक्ति पारिवारिक विवादमा परेपछि पक्राउ परेका थिए।
केही समयको अनुसन्धान र कानुनी प्रक्रियापछि अमेरिकी प्रशासनले उनलाई डिपोर्ट गर्ने निर्णय गरेको थियो। त्यसपछि काठमाडौं स्थायी घर भएका उनलाई चार्टर्ड विमानमार्फत काठमाडौं पठाइएको थियो। काठमाडौं आएपछि मानव बेचबिखन अनुसन्धान ब्यूरोका अधिकारीहरूले उनीसँग संक्षिप्त सोधपुछ गरेका थिए। तर, डिभी परेर गएको व्यक्ति भएकाले उनीहरूको धेरै सरोकारको विषय नभएको एक अधिकारीले बताएका छन्।
अध्यागमन विभागका महानिर्देशक गोविन्द रिजालका अनुसार, आइतबार अमेरिकाबाट ३७ जना नेपाली डिपोर्ट भएर काठमाडौं आएका थिए, जसमा ५ जना महिला थिए। उनीहरूलाई एरिजोना राज्यबाट ओम्नी एयर इन्टरनेशनलको विमानमा ढाका हुँदै काठमाडौं ल्याइएको थियो। प्रहरीले उनीहरूसँग अवैध बाटोबाट अमेरिका पठाउने गिरोहबारे जानकारी लिन खोजे पनि उनीहरूले त्यति समन्वय नगरेको अधिकारीहरू बताउँछन्। यसअघि २१ फागुन २०८१ मा डिपोर्ट भएर आएका ८ जना नेपालीले पनि आफूलाई अमेरिका पठाउने गिरोहबारे सूचना दिन नमानेको र जाहेरी दिन समेत इन्कार गरेको अनुसन्धानमा संलग्न एक अधिकृतले बताए।
अमेरिकी राष्ट्रपति डोनाल्ड ट्रम्पले अवैध आप्रवासीविरुद्ध कडा नीति लिँदै आएका छन्। सन् २०२५ को जनवरी २० देखि मे महिनाको अवधिमा मात्रै १४० जना नेपालीलाई अमेरिकाले डिपोर्ट गरिसकेको छ। अध्यागमन विभागको तथ्यांकअनुसार, जनवरीमा ६, फेब्रुअरीमा २०, मार्चमा ३०, अप्रिलमा २६ र मे महिनामा ५८ जना नेपाली अमेरिकाबाट डिपोर्ट भएका छन्।
डिपोर्ट हुनेहरूमा दलाललाई मोटो रकम बुझाएर अवैध रूपमा अमेरिका प्रवेश गर्नेहरूको संख्या धेरै रहेको अधिकारीहरू बताउँछन्। विगतका वर्षहरूमा पनि अमेरिकाबाट नेपालीहरू डिपोर्ट हुने क्रम जारी नै थियो। अध्यागमन विभागको तथ्यांकअनुसार, सन् २०२१ मा ३५, सन् २०२२ मा २२, सन् २०२३ मा २४ र सन् २०२४ मा ५२ जना नेपाली अमेरिकाबाट डिपोर्ट भएका थिए। डिभी विजेतासमेत डिपोर्ट हुनुले अमेरिकी अध्यागमन नीतिको कडापन र यसका कारण नेपालीहरूले भोग्नुपरेको समस्यालाई कसरी हेर्न सकिन्छ?
२०८२ जेष्ठ २६, सोमबार
