ललितपुर : ललितपुर महानगरपालिकाले आजबाट आफ्नो क्षेत्रभित्रका अनधिकृत संरचनाहरू हटाउन सुरु गरेको छ। विशेषगरी मूल सडकको छेउछाउमा निर्माण गरिएका घरहरूमा बनाइएका अनधिकृत पाली लगायतका संरचनाहरू हटाइएको महानगरप्रमुख सीताराम हाछेथुले जानकारी दिएका छन्।
नगरप्रमुख हाछेथुका अनुसार, यो अभियान अब निरन्तर चल्नेछ। आज शंखमूल क्षेत्रमा यस्ता संरचनाहरू हटाउने काम थालिएको छ। भोलिदेखि भने मंगलबजार, पुल्चोक लगायतका अन्य क्षेत्रहरूमा पनि अनधिकृत संरचना हटाउने कामलाई तीव्रता दिइनेछ।
महानगरपालिकाले शहरी सौन्दर्य कायम राख्न र सार्वजनिक स्थानको अतिक्रमण रोक्न यो कदम चालेको बुझिएको छ। यस अभियानले ललितपुरका सडक र सार्वजनिक स्थानहरू थप व्यवस्थित र खुल्ला बनाउन सहयोग पुग्ने अपेक्षा गरिएको छ।
२०८२ जेष्ठ २६, सोमबार
