काठमाडौं : आज (सोमबार) बिहानैदेखि काठमाडौं उपत्यकाभित्र र बाहिरका सार्वजनिक सवारी साधनहरू ठप्प छन्। यातायात व्यवसायीहरूको देशव्यापी अनिश्चितकालीन बन्द आह्वानको प्रत्यक्ष प्रभाव राजधानीमा देखिएको हो, जसले दैनिक जनजीवनमा ठूलो असुविधा पुर्याएको छ।
बिहानैदेखि काममा जाने सर्वसाधारण र कलेजका विद्यार्थीहरू सबैभन्दा बढी मर्कामा परेका छन्। गन्तव्यमा पुग्न उनीहरू पैदल हिँड्न बाध्य भएका दृश्यहरू काठमाडौंका सडकहरूमा सामान्य बनेका छन्। काठमाडौं उपत्यकाभित्र चल्ने सिटी बसहरूदेखि लिएर बाहिर जाने लामो तथा छोटो दूरीका सवारी साधनहरू समेत नयाँ बसपार्क र विभिन्न ग्यारेजहरूमा थन्किएर बसेका छन्।
नेपाल राष्ट्रिय यातायात व्यवसायी राष्ट्रिय महासंघले यो आन्दोलनको नेतृत्व गरिरहेको छ। उसलाई ट्रक यातायात व्यवसायी, ढुवानी व्यवसायी संघ, मजदुरलगायत यातायात क्षेत्रसँग सम्बद्ध अन्य सात संघसंस्थाहरूले पनि साथ दिएका छन्। गण्डकी प्रदेश सरकारले ल्याएको राइड सेयरिङ नियमावलीको विरोधमा यो आन्दोलन सुरु भएको हो, जसको प्रभाव अहिले राष्ट्रव्यापी बनेको छ।
सार्वजनिक यातायात ठप्प भए पनि, पठाओ,इनड्राइभ जस्ता राइड सेयरिङ सेवा प्रदायकहरूले भने यात्रुहरूलाई केही हदसम्म राहत पुर्याएका छन्। चर्को मूल्य भए पनि अत्यावश्यक काममा निस्किएका यात्रुहरूले ट्याक्सी र निजी सवारी साधनहरूमा आधारित यस्ता सेवाको प्रयोग गरिरहेका छन्। यद्यपि, यी सेवाहरूले सबै यात्रुको माग पूरा गर्न नसकेको र मूल्य पनि सामान्यभन्दा बढी भएकाले सर्वसाधारणका लागि चुनौती कायमै छ।
यातायात व्यवसायीहरूको यो कदमले दशैभरको आर्थिक गतिविधिमा नकारात्मक प्रभाव पर्ने देखिन्छ, र यसको समाधानका लागि सरकार र आन्दोलनकारी पक्षबीच तत्काल वार्ताको आवश्यकता देखिएको छ।
२०८२ जेष्ठ १९, सोमबार
