काठमाडौं : काठमाडौंको चन्द्रागिरि नगरपालिका-४ पानीघाटमा शनिबार राति भएको मोटरसाइकल दुर्घटनामा एक महिलाको मृत्यु भएको छ। दुर्घटनामा नुवाकोटको ककनी गाउँपालिका-१ की ३६ वर्षीया सुनिता बलामीको ज्यान गएको ट्राफिक प्रहरी कार्यालय काठमाडौंले जनाएको छ।
मकवानपुरको चित्लाङबाट काठमाडौं आउँदै गरेको प्रदेश ०२–०१ प ८०६८ नम्बरको मोटरसाइकल शनिबार राति पौने ८ बजे दुर्घटनामा परेको थियो। दुर्घटनामा गम्भीर घाइते भएकी बलामीको बलम्बुस्थित एपीएफ अस्पतालमा उपचारका क्रममा मृत्यु भएको हो।
दुर्घटनामा मोटरसाइकल चालक ककनीकै मानबहादुर बलामी पनि घाइते भएका छन्। उनको सोही अस्पतालमा उपचार भइरहेको प्रहरीले जनाएको छ। दुर्घटनाको कारणबारे प्रहरीले थप अनुसन्धान गरिरहेको छ।
२०८२ जेष्ठ १८, आईतबार
