काठमाडौं: नेपालमा राजसंस्थाको पक्षमा सुरु भएको ‘संयुक्त जनआन्दोलन’ले राजधानीका संवेदनशील क्षेत्रहरूमा आफ्नो उपस्थिति जनाउन थालेको छ। सरकारमाथि दबाब बढाउने रणनीतिअनुसार राजावादीहरूले शनिबार (जेठ १७ गते, २०८२) नारायणहिटी दरबार सङ्ग्रहालयकै अगाडि वृहत् जनप्रदर्शनको तयारी गरेका छन्।
यस आन्दोलनको पहिलो दिनको प्रदर्शन रत्नपार्कमा केन्द्रित थियो, जहाँ सहभागीहरूले राजसंस्था र हिन्दु राष्ट्रको पक्षमा नारा लगाएका थिए। दोस्रो दिन शुक्रबार (आज) यो प्रदर्शन माइतीघर मण्डलामा सर्यो, जुन सरकारविरुद्धका आन्दोलनहरूको केन्द्रबिन्दु मानिन्छ। अब तेस्रो दिन, अर्थात् भोलि शनिबार, आन्दोलनलाई नारायणहिटी दरबारको नाकैमा पुर्याउने तयारी गरिएको राप्रपाका प्रवक्ता मोहन श्रेष्ठले जानकारी दिए।
प्रवक्ता श्रेष्ठका अनुसार, आन्दोलन पूर्णतया शान्तिपूर्ण हुनेछ र हिंसा भड्काउने कुनै रणनीति अहिले नभएको उनको भनाइ छ। उनले सरकारबाट पनि त्यस्तै व्यवहारको अपेक्षा गरेको बताए। नारायणहिटी दरबारभित्र प्रवेश गर्ने योजना छ कि छैन भन्ने प्रश्नमा श्रेष्ठले भने, “अहिले त्यस्तो छैन। हामी शान्तिपूर्ण माध्यमबाटै नवीन समझदारीका लागि दबाब दिइरहेका छौं।” यद्यपि, उनले सरकारले शान्तिपूर्ण आन्दोलनलाई बेवास्ता गरिरहेमा आफूहरूले पनि कठोर निर्णय लिनुपर्ने अवस्था आउन सक्ने चेतावनी दिए। यस भनाइले भविष्यमा आन्दोलनको स्वरूप अझ आक्रामक हुन सक्ने सङ्केत गरेको छ।
यो प्रदर्शनले राजसंस्थाको पुनःस्थापनाको मागलाई थप मुखरित गर्ने र सरकारमाथि थप दबाब सिर्जना गर्ने अपेक्षा गरिएको छ। सुरक्षा निकायले भने प्रदर्शनको अवस्थालाई नजिकबाट नियालिरहेका छन्।
२०८२ जेष्ठ १६, शुक्रबार
