काठमाडौँ — नेकपा एमालेले पूर्वउपमहासचिव घनश्याम भुसाललाई पनि प्रतिनिधिसभाको उम्मेदवार नबनाउने निश्चित भएको छ । अध्यक्ष केपी शर्मा ओलीको पार्टी सञ्चालन प्रक्रियाको आलोचना गर्दै आएका भुसालले अघिल्लो पटक जितेको रुपन्देही ३ एमालेले राप्रपालाई छाड्ने सहमति गरेको छ ।
शुक्रबार साँझ अध्यक्ष ओली निवास बालकोटमा दुवै पार्टीबीच भएको वार्तामा ३ वटा निर्वाचन क्षेत्रको टुंगो लागेको स्रोतले जनाएको छ ।
‘अहिलेसम्म झापा ३, रुपन्देही ३ र बाँके २ राप्रपाले लिने विषयमा टुंगो लागेको छ,’ राप्रपा स्रोतले भन्यो, ‘बाँकी प्रतिनिधिसभा तथा प्रदेशसभाको सीटको टुंगो शनिबार बस्ने बैठकले लगाउने छ । ‘
राप्रपाका अध्यक्ष राजेन्द्र लिङ्देनसहितको टोलीले शुक्रबार साँझ सीट बाँडफाँटको विषयमा एमाले अध्यक्ष ओलीसँग वार्ता गरेको थियो । राप्रपाले सो क्षेत्रबाट दीपक बोहोरालाई उम्मेदवार बनाउने छ । २०७४ सालको प्रतिनिधिसभा निर्वाचनमा भुसालले बोहोरालाई पराजित गरेका थिए ।
स्थायी कमिटीका सदस्य भुसालसहितका तिलोत्तमाका पूर्वमेयर बासुदेव घिमिरे, दुर्गा भुसाल तथा सर्वजीत शाहको नाम सिफारिस गरेको थियो । भुसालले रुपन्देही १ बाट प्रतिनिधिसभा उम्मेदवार बन्न चाहेका थिए ।
प्रतिनिधिसभा निर्वाचन क्षेत्र समन्वय कमिटी र जिल्ला कमिटीले भुसालको नाम सिफारिस गरेपछि प्रदेश कमिटीले रुपन्देही १ बाट सचिव छविलाल विश्वकर्माको नाममात्रै सिफारिस गरेको थियो । रुपन्देही १ बाट विश्वकर्माले टिकट पाउने निश्चित छ ।
