काठमाडौं । राष्ट्रिय सभा सदस्यका लागि उम्मेदवारी दिएका दुई जनाविरुद्ध उजुरी परेको छ ।
कर्णाली प्रदेशबाट दलित समूहमा उम्मेदवारी दिएका माओवादी केन्द्रका विष्णुबहादुर विकविरुद्ध उजुरी परेको छ । उनी समानुपातिकतर्फको बन्द सूचीमा रहेको भन्दै हिक्मत विकले उजुरी दर्ता गरेका हुन् ।
यस्तै सुदूरपश्चिम प्रदेशबाट अपांगता समूहमा उम्मेदवारी दिएका नेपाली कांग्रेसका नाराणयदत्त भट्टविरुद्ध पनि उजुरी परेको निर्वाचन आयोगका प्रवक्ता शालिग्राम शर्मा पौडेलले जानकारी दिएका छन् ।
भट्टविरुद्ध रामचन्द्र जोशीले उजुरी दर्ता गरेका हुन् । उजुरीकर्ता दुवैजना नेकपा एमालेका उम्मेदवार हुन् । राष्ट्रिय सभाका १९ सदस्यमा हिजो ५२ जनाको उम्मेदवारी परेको थियो । उम्मेदवारविरुद्ध दाबी विरोध र उजुरी दर्ता आयोगले आज दिउँसो चार बजेसम्मको समय दिएको थियो । चुनाव भने माघ ११ गते हुनेछ ।
२०८० पौष २४, मंगलबार
